【拒絕學生妹】
今日有個學生妹叫我買慈善獎券，我對住學生妹唔知點解會特別難拒絕，如果要求唔係太離譜，我好容易就應承。不過我今日拒絕咗。 對話： 佢：買唔買獎卷？ 我：獎卷係咩黎㗎？(原諒我無知) 佢：東華獎卷，二十蚊一張，可能中獎呢！ 我：唔要喇，唔該。 佢：好。 我本身忍唔住買，講真$20又唔係多，而家食餐飯都要$50；但「可能中獎呢」呢句令我好反感，我諗冇人買慈善獎券係為咗中獎，如果我買係為咗中獎，咁我點解唔買馬、六合彩呢？買慈善獎券主要當然係為咗幫人(慈善)，獎只是其次，唔明佢點解會用「可能中獎」作為理由。 如果係我會咁講： 「你好！(問候) 我係XX學校嘅學生 (表明身份) 而家東華有個慈善獎卷，二十蚊一張，千祈唔好睇少呢二十蚊，呢少少錢對啲基層家庭已經有好大幫助㗎喇！(表明來意和買的好處) 希望你可以為慈善出一分力啦。(收尾)」 如果佢咁同我講，我已經買咗。 同埋講野要大聲，繁忙嘅香港人成日都趕住返學放學、返工放工，你唔夠大聲，通常都唔會理你。