【推銷技巧】(初稿)

我以前係個好純粹嘅私補導師，覺得淨係教好個學生就夠，好少Sell啲家長，就算Sell，都係Sell一兩句，佢唔補就算。但最近發現唔Sell真係好難揾學生，就學下點樣Sell。同埋有個朋友最近同我講，話想做私補，我想借呢個機會分享下自己最近學習嘅推銷技巧。(其實我都唔知自己有冇能力分享)

首先，問問題係好緊要，可以了解個家長的想法，從而知道點處理。「你覺得如何？」「請問您還有什麼問題嗎」適宜多問。

大體上，可以把拒絕的原因分為三類：太貴、不需要、我想再考慮一下。以下是我想了很久，之後得出的應對方法。

1、太貴

應對：強調補習的價值，並勾勒出美好的將來。

例子：的確係有啲貴，但絕對值得！

因為中文成績關乎佢嘅前途，佢唔使好耐就要呈分試，可唔可以入到心儀嘅中學就要靠呈分試的成績。如果到時因為中文成績而入唔到心儀嘅中學，咁真係太可惜喇！

我相信為人父母都希望仔女將來出人頭地，希望你可以投資呢少少錢落佢身上。

況且呢啲錢唔係用黎吃喝玩樂，而真係對佢將來好有用。我相信佢將來一定會多謝你今日呢個決定！

2、不需要

應對：間接地反駁，讓佢了解自己的潛在需要。

例子：可能你而家覺得不需要，但佢不久嘅將來就要呈分試。中文係語文科，需要慢慢浸，語文基礎好難一時之間提升到好多。如果到時先再揾老師，恐怕太遲。

(9吹)我有個學生嘅家長以前都覺得唔需要，但佢之後差唔多呈分試先發現情況太嚴重，先黎揾我，但太遲喇，短時間根本提升唔到啲乜。咁真係太可惜喇！

3、我想再考慮一下。

應對：要迫佢儘快決定。

例子：如果可以嘅話，可唔可以呢一兩日就決定？因為我而家仲有兩個學生就滿晒，到時可能幫唔到你補。

或者介唔介意補一兩堂再睇下大家適唔適合？我相信你到時會有一個確定嘅答案。

「例子」未必要講晒，睇情況而講吧。

另外，可以再加呢啲句子：

「其實佢並唔差/可以更好，佢只係遇唔到一個適合嘅老師，真令人遺憾！不過請放心，我有相信可以幫到佢。」

「請你相信我，我一定可以幫到佢提升中文能力！」

「冇學好中文真係太可惜喇」

「試想像一下，佢將來唔使靠人，自己就可以寫到一篇優秀嘅文章，咁唔係好令人期待咩？」